განათლების, მეცნიერებისა და ახალგაზრდობის მინისტრის მოადგილე ბაია კვიციანმა მორიგი შეხვედრები რაჭა-ლეჩხუმისა და ქვემო სვანეთის რეგიონში, ონსა და ცაგერში გამართა, სადაც მონაწილეებმა პანელური დისკუსიის ფარგლებში ინკლუზიური განათლების მიმართულებით არსებულ გამოწვევებსა და სისტემის შემდგომი განვითარების გზებზე იმსჯელეს.

დისკუსიის ფარგლებში განსაკუთრებული ყურადღება დაეთმო ისეთ საკითხებს, როგორიცაა ინკლუზიური განათლების მიმართულებით არსებული სერვისების ეფექტიანობა, სკოლამდელი, სასკოლო და სკოლისშემდგომი განათლების მიმართულებით არსებული შესაძლებლობები, ინკლუზიური განათლების მიწოდების პროცესში ჩართული სპეციალისტების მხარდაჭერა და სისტემური გამოწვევები.

მონაწილეებმა იმსჯელეს რეგიონში არსებულ გამოწვევებზე და მათი გადაჭრის გზებზე.

აღინიშნა, რომ საჯარო დიალოგში მშობელთა ჩართულობა განსაკუთრებით მნიშვნელოვანია და მათი მოსაზრებები სერვისების გაუმჯობესებაში მნიშვნელოვან როლს შეასრულებს. მათი მხარდაჭერისთვის სამინისტრო პარტნიორ ორგანიზაციასთან ერთად 6 მუნიციპალიტეტში „პოზიტიური მშობლობის” სესიებს ჩაატარებს.

შეხვედრის დასრულების შემდეგ გაიმართა ფოკუს ჯგუფი და მონაწილეებს კონკრეტული გამოწვევების იდენტიფიცირებისა და თავიანთი იდეების გაზიარების შესაძლებლობა ჰქონდათ.

ქალაქ ონსა და ცაგერში ჩატარებულ შეხვედრებს ესწრებოდნენ განათლების, მეცნიერებისა და ახალგაზრდობის სამინისტროს და ადგილობრივი ხელისუფლების წარმომადგენლები.